Espainiako hauteskundeak: datuak, analisia, galderak, umorea…

Azkenik amaitu dira Espainiako hauteskundeak. Denak irabazle? Momentu honetan dauden datuekin badirudi horrela izango dela. PSOEk hauteskundeak irabazi ditu aurrekoetan baino parlamentari gehiagorekin. PPk ere goraka egin du eta honek beraien porrota disimulatzen lagunduko die. IU eta ERCk ezingo dute inongo aitzakirik jarri jasotako emaitzei, edo agian bai: Llamazaresek horrenbeste aipatu duen “tsunami bipardista”. CIU mantendu egin da eta Rosa Diez gehiago entzungo dugula dirudi…

Euskal Herrian, bi mapa ezberdin ikusi ditzazkegu. Nafarroan ez dago mugimendurik eta aurrekoetan izandako emaitza berberak izan dira (UPN-PP 2, PSN 2, Nafarroa Bai 1). EAEn aldiz, aldaketa nabarmena izan da: PSE 7tik 9ra pasatu da, EAJ 7tik 6ra eta PP 4tik 3ra; EAk ez du lortu mantentzea zuen parlamentaria.

Galderak:

• Zeinekin egingo ditu paktuak ZPk?
• Zer gertatuko da PPko buruzagitzan?
• EAJk nolabaiteko autokritika egingo al du? Ibarretxek bere kontsultarekin aurrera jarraituko al du emaitza hauen ondoren?
• Llamazaresek dagoeneko adierazi du ez dela aurkeztuko koordinatzaile izateko IUren hurrengo Asanbladan. Zer gertatuko da alderdi honekin?
• Zein izango da euskal gatazkari aurre egiteko modua hurrengo lau urteetan?

PPn momentu honetan gerta daitekeenaren inguruan (non zeuden Zaplana, Aguirre eta Gallardon Rajoy atera denean?…), hona hemen prestatu dudan komiki txiki bat:

http://www.bitstrips.com/read.php?comic_id=2337&feed=c_8

Honela bozkatzen du ETAk

Atzo ETAk Espainiako hauteskundeetan bere azken agerpena egin zuen. Kasu honetan langile bat hil du, Arrasateko PSEko zinegotzi ohi bat: Isaias Carrasco. Honek ez du azalpen gehiegirik behar. Hitzak soberan daude, nahiz eta hainbat etortzen zaizkiten burura bidegabekeria hau definitzeko.

Eskerrak eman nahi dizkiot ETAri. Duda asko nituen biharko hauteskundeen inguruan eta argitu dizkidazute: NIK BIHAR BOZKATU EGINGO DET.

Agur Isaias eta nire elkartasun osoa bere familiarekin.

Habemus president

Azkenean. Oztopo, zangotraba eta guztien gainetik, Iñaki Badiola Errelaren presidente izango da. Gaur, ohiko ez biltzarrean izandako botaketan, berak eta aurkezten zituen beste kontseilariek uste baino akzio gehiagoren babesa izan dute. Present zeuden 79.283 akzioetatik, 57.004ren babesa lortu du, hau da, gutxigorabehera %70arena.

Orain berak ezarritako helburua betetzeko garaia iritsi da: Erreala Lehen Mailara itzultzea. Bitartean, eta egun eta aste gutxiren bueltan, hainbat duda argitu beharko ditu: fitxaketak, Coleman, due diligence, finantziazio iturriak,…

Euskizofreniatik zorte onena opa diegu berari eta bere kontseiluko parte diren pertsonei. Bestalde, hainbat botere ezberdinetatik (politikoak eta faktikoak) izango duten jarreraren zain gelditzen gara. Orain artekoa bezain frentekoa eta bortitza izango al da? Errealaren onerako espero dugu erantzuna ezezkoa izatea.

Gipuzkoalandeko herritarrok ilusioa berreskuratu nahi dugu, Badiola jaunarekin edo hori lortzeko gai den beste edozeinekin. Ilusioa Errealaren zale izatearen harrotasunari gehitu nahi diogu. Taldea Lehen Mailan ikusi nahi dugu eta mendeurrena bertan ospatu. Hori zelaian lortu beharko da…

Urteberri on!

Gaur hori da mezu nagusia. Gure familiko kideei, lagunei, ezagunei eta baita ezezagunei ere bere lehen orduak bete dituen urte hau ona izatea opa diegu. Hala izan dadila ere hau irakurtzen duzutenentzako. Euskizofrenia bizi dugunok, gure gaixotasunaren aurkako txertoaren aurkikuntza biziko dugu?

Txinatarrentzat hau arratoiaren urtea omen da. Ea nolako zortea duten aurten, lehen aldiz joku olinpikoak antolatzen dituzten honetan. Niretzat aldiz, hauteskundeen urtea da. Gertu edo urruti, gutxiago edo gehiago axola zaizkidalarik, hainbat hauteskunde egongo dira aurten hitzegiteko asko emango dutenak. Horien inguruan zabalago hitzegiteko aukera egongo da. Gaurko postean zenbatu besterik ez ditut egingo:

• Urtea hasteko, Gipuzkoalandeko herritarrok bereziki jarraituko ditugun “hauteskunde” batzuk: Errealarenak. Badiola bai ala ez?
• Martxoan, Espainiako hauteskunde orokorrak izango ditugu. Zapaterok jarraituko du Moncloan edo maletak egin eta Rajoyri egin beharko dio lekua?
• Azaroan, Estatu Batuetan izango dira hauteskunde presidentzialak. Bush administrazioak agur esango du (8 urte luze eta tragikoen ostean…) eta Inperioak buruzagi berria izango du. Hillary, Obama edo Edwards demokraten aldetik, eta Giuliani, Romney edo Huckabee errepublikarren aldetik. Sei gizon eta emakume horien artean egongo da erantzuna.

Azkenik, ez nuke ahaztu nahi Urrian egon litekeen erreferenduma. Ibarretxe bukaeraraino iritsiko da? Erreferenduma izango dugu? Apostuak irekiak daude. Nik ezezkora joko nuke. Eta zuk?

 

M27(2): Nafarroako borroka

Behingoz, inkestek gerta zitekeena gutxi gora behera asmatu zuten. Nafarroan iraultza txiki bat gertatu da eta UPNk boterea gal lezake aspaldiko partez.

Hauteskunde-kanpainan zehar, Nafarroa Bai koaliziotik hainbat mezu bidali zizkieten PSNkoei paktu orokor bat eskeiniaz: PSNrentzat Nafarroako lehendakaritza (Fernando Puras), eta Nafarroa Bai-rentzat Nafarroako Legebiltzarreko lehendakaritza (Patxi Zabaleta) eta Iruñako alkatetza (Uxue Barkos).

Hauteskunde gauetik aurrera, gerta daitekeena zalantzan mantentzen da. Informazioak egunetik egunera aldatzen dira zentzu batean edo bestean. Nafarroa Bai koalizioak bere eskaintza mantendu du eta IUN-NBE ere paktu horretan sartzeko prest azaldu da, UPN Nafarroako gobernutik eta hainbat alkatetzatik kentzeko asmoz. UPN amnesia txiki batean bizi da, eta PSNren aurka azken hilabeteetan zabalduriko borroka frontea (Nafarroa ETAri salduko ziotela behin eta berriro errepikatuaz, manifestazioak antolatuaz Madrileko makinaria guztiarekin batera,…) ahaztuaz, akordio bat eskeini dio.

PSN alderdia, momentu honetan gobernuko giltza duena, ez da inorrekin ezkondu momentuz. Alderdiaren barruan sentsibilidade ezberdinak daude: zuzendaritza Nafarroa Bai koalizioarekin akordio bat sinatzearen aldekoa dela diote hainbat informazioek, baina beldur direla Erribera aldean dituzten hautesleen artean izan dezakeen ondorioetaz. Bestalde, Madrilgo PSOEren zuzendaritzako presioak egongo lirateke. Informazio batzuk diotenaren arabera, Zapatero eta Blanco Nafarroa Bai-rekin paktatzearen aldekoak dira, eta Rubalcaba eta hainbat PSOEko hainbat “baroi” berriz, UPNrekin akordioak lortzearen aldekoak. Informazio horien arabera, Rubalcabak irabazi du presio joku horretan eta paktua UPNrekin izango litzateke, nahiz eta hori ez duen inorrek konfirmatu oraingoz.

Bitartean, EAE-ANVk bidea erraztu dio Uxue Barkosi Iruñako alkatetzarako bere bidean, bere bi botoak UPNrena ez den edozein hautagairi eskeiniko baitizkio, nahiz eta adierazi “sudurra estalirik” egingo dutela.

Nafarroako borrokak jarraitzen du. Posizio guztiak mahai gainean daude eta aste batzuk barru emaitzak ikusi ahal izango ditugu.

Aldaketa edo jarraipena? Puras edo Sanz? Barcina edo Barkos?

M27 (1): Denak irabazle?

Ohikoa den bezala, eta edozein hauteskundetan gertatzen den antzera, Maiatzak 27ko emaitzak ebaluatzeko garaian, alderdi politikoek beraien burua irabazletzat jo dute beste behin ere. Ikus dezagun alderdi nagusiek ze analisi egin duten EAEren kasuan:

PSE-EE-ren aburuz, beraien alderdia da EAEn boto gehien gehitu dituen alderdia, Gipuzkoan irabaziz, Araban “berdinduz” eta 5 puntu irabaziarekin Bizkaian.

EAJ berriz, Bizkaiko emaitzetara heltzen da, batez ere Bilbon Azkunak lortu duen garaipenera. Boto globalak hartuta lehen alderdia direla argudiatzen dute beraien poza justifikatzeko. Emaitza txarrak (Gipuzkoako lidertza galtzea, Donostia eta Gasteizko deskalabruak,…) EA-rekin zuten koalizioaren hausturarekin azaldu nahi izan dute.

Ezker Abertzalea pozez gainezka dago. Ilegalizazioak eta Barajaseko atentatua direla medio, eta boto baliogabeak beraiei esleitzen badizkiegu, Euskal Herritarrok markarekin izan zituzten emaitzak EAE-ANVrekin hobetu dituztela esan dezakegu. Tradizionalki gotorleku izan dituzten hainbat alkatetza berreskuratu dituzte, eta Gipuzkoan, bigarren alderdi izango litzateke aurkezteko aukera izan balute.

EA-k ere, koalizioaren apurketa erabiltzen du bere emaitza txarrei azalpen bat emateko. Hala ere, M27a positibotzat jotzen dute, instituzio guztietan ordezkaritza lortu izanagatik (Bilboko udaletxean izan ezik), eta inflexio puntutzat jo dituzte, hurrengo hauteskundeetan gora joko dutelakoan.

EB-Aralar koalizioan, Gipuzkoan izan duten aurrerapen nabarmenean jartzen dute enfasia, eta baita Bizkaian eta Araban izandako emaitzetan ere. Datuetara heltzen dira, aurreko hauteskudeetan banandurik aurkeztu zirenean 109 zinegotzi eta 10 batzarkide lortu zituztela esateko, eta oraingoan berriz, zinegotziak 136 izan direla eta 12 batzarkideak.

Azkenik, PPn etzeuden aste honetan zehar poz askotarako. Beldurraren politika beraien kalterako izan zaie, eta Madrileko zuzendaritzak erabilitako estrategiak berriz ere Euskal Herrian ez diela askorako balio erakutsi da.